ბაბა შეიხ ხატოს ხსოვნისადმი მიძღვნილი სამგლოვიარო ღვთისმსახურება
2020-10-05
 |
4 ოქტომბერს თბილისში, ეზიდურ ტაძარში ჩატარდა მსოფლიო ეზიდთა წინამძღოლის, მარგაჰის ახტიარის, ბაბა შეიხ ხატო ჰაჯი ისმაილის ხსოვნისადმი მიძღვნილი სამგლოვიარო ღვთისსამსახურება. ლიტურგიის შემდეგ ეზიდური კულტურის ცენტრში ჩატარდა ხსოვნის საღამო. გამართულ ღონისძიებას ესწრებოდნენ ეზიდური თემის წარმომადგენლები და აგრეთვე საქართველოს საზოგადო და რელიგიური მოღვაწეები. ეზიდთა სასულიერო პირებმა ღვთისმსახურება აღასრულეს, რის შემდეგაც, საქართველოს ახტიარმა ფირ დიმიტრი ფირბარიმ ისაუბრა ბაბა შეიხ ხატოს ღვაწლზე. სრულიად საქართველოს კათოლიკოს პატრიარქის, ილია II-ის სახელით, ღონისძიებაზე სამძიმრის სიტყვა წარმოთქვა საქართველოს საპატრიარქოს საგარეო კავშირების განყოფილების მოადგილემ მამა მიქაელმა, ხოლო ვატიკანის საგანგებო ელჩმა, ჟოზე აველინ ბეტენკურმა, თავის გამოსვლაში გაიხსენა ბაბა შეიხ ხატოს ვიზიტი ვატიკანში და მიუსამძიმრა ყველა ეზიდს. სამძირმრის სიტყვით გამოვიდა, საქართველოს ბაპტისტურ-ევანგელური ეკლესიის წინამძღვარი, თბილისის მიტროპოლიტი მალხაზ სონღულაშვილი. მან გაიხსენა თავისი ვიზიტი ლალიშში 2018 წელს და ბაბა შეიხთან შეხვედრის დეტალები, შემდეგ კი ისაუბრა ბაბა შეიხის ღვაწლზე და მისი მემკვიდრეობის მნიშვნელობაზე. სამძიმრის სიტყვით აგრეთვე წარსდგა საქართველოს მუსლიმთა უმაღლესი საბჭოს ხელმძღვანელი შეიხი მირთაგ ასადოვი. მწუხარება გამოთქვა საქართველოს პრემიერ-მინისტრის თანაშემწემ სოზარ სუბარმა. ბაბა შეიხისათვის უკანასკნელი პატივის მისაგებად ეზიდთა სასულიერო საბჭოში შემოვიდა უამრავი წერილი, სხვადასხვა რელიგიური და საზოგადოებრივი ორგანიზაციებიდან, სადაც გამოხატული იქნა წუხილი ბაბა შეიხის გარდაცვალებასთან დაკავშირებით.
|
